Songon siala na sampagul, rap tu ginjang rap tu toru. Muda malamun saulak lalu, muda magulang rap margulu.
Sahata saoloan, na sapangambe sapanaili. Satahi dohot dongan, maroban sonang pangarohai.
Muda sabara asa sabustak, asa salumpat saindege boti sapangambe sapanili. Hasonangan na so unjung mantak, bo baritana sai tarbege.
Muda manyuruk rap unduk, muda mangambur rap gas.
Lambok bulung ni eme, na lambok marluyun-luyun. Lambok lidung binege, i ma dalan marhalalungun.
Tando batu ni pangkat, lomlom gorsing songon simbora. Tandona hita na sapokat, bulung botik mardai mera.
Holong do mangalap holong. Antusanna, muda holong rohaniba di dongan, tauken holong ma roha ni dongan di iba. Hara ni i inda tola iba mantak patidahon holong ni roha i tu dongan, anso di hatihana muse manjagit iba hadengganan sian dongan.
Muda pahae simanggurak, pahulu sitimpulon, antusanna muda nibaen na denggan tu dongan, laing na denggan ma jagiton balosna.
Mata guru roha sisean. Umpama on nidok ma i tu halak anso sai ra ia maniru na denggan di pangalaho na niidana sian dongan.
Muda jongjong di na tigor batu mamak di andora.
Pantun hangoluan, teas hamatean.
Patar songon indahan di balanga.
Rukrek parau mambaen tu rapotna.
Sada do martoktok hite, sude markitehonsa.
Sada huat tu jolo, dua huat tu pudi.
Sadao-dao ni obok-obok ujungna laing madabu tu tano.
Talu do gogo dibaen bisuk.
Tubu dingin-dingin, di toru ni andomang. Horas tondi madingin, sian menek lopus magodang.
